Më 18 qershor 2025, në kuadër të Javës së Ndihmës Juridike Falas, Agjencia për Ndihmë Juridike Falas (ANJF) në bashkëpunim me Qendrën Kosovare për Rehabilitimin e të Mbijetuarve të Torturës (QKRMT) organizoi një sesion informues në Qendrën për Promovimin e të Drejtave të Grave (QPDG) në Drenas.
Qëllimi i këtij aktiviteti ishte informimi dhe fuqizimi i të mbijetuarave të dhunës seksuale gjatë luftës, përmes sqarimit të të drejtës për përfitimin e dy pensioneve: pensionit të rregullt dhe atij për statusin e viktimës së dhunës seksuale gjatë luftës.
Në sesion morën pjesë përfaqësues nga ANJF, QKRMT dhe QPDG, të cilët prezantuan: procedurat ligjore, dokumentacionin e nevojshëm, dhe shërbimet që ofron ndihma juridike falas për këtë kategori.
Diskutimi u shoqërua me pyetje dhe përgjigje të drejtpërdrejta nga pjesëmarrëset, duke sqaruar sfidat dhe paqartësitë në realizimin e të drejtave të tyre.
Gjatë aktivitetit u shpërndanë materiale informuese dhe u ofrua asistencë individuale për rastet që kërkojnë mbështetje të mëtejme.
Ky aktivitet u zhvillua në frymën e bashkëpunimit ndërinstitucional dhe përkushtimit për të siguruar qasjen e barabartë në drejtësi, gjithmonë me respekt dhe ndjeshmëri ndaj dinjitetit të të mbijetuarave.